অসম চৰকাৰ গুৱাহাটী উন্নয়ন বিভাগ

গুৱাহাটী অসমৰ ৰাজধানী আৰু সমগ্ৰ উত্তৰ-পূৰ্বাঞ্চলৰে দুৱাৰমুখ। গৃষ্মৰ সময়ছোৱাত যেতিয়া প্ৰচণ্ড বৃষ্টিপাত হয় তেতিয়া এই মহানগৰ বানপানীৰ দ্বাৰা আক্ৰান্ত হয়। মেঘালয়ৰ পৰা বাগৰি অহা বৰষুণৰ পানী আৰু ইয়াক আৱৰি থকা পাহাৰে পথ আৰু পানী পৰিবাহী নলাসমূহৰ বিস্তৰ ক্ষতিসাধন কৰে। ই পানী বন্ধ হৈ ৰোৱাৰ দৰে ভয়ংকৰ সমস্যাৰ সৃষ্টি কৰে। চহৰৰ কিছুমান অঞ্চলত বহুদিনলৈ এনে কৃত্ৰিম বানপানী অব্যাহত থাকে আৰু ই বহু চৰকাৰী আৰু ৰাজহুৱা সম্পত্তিৰ বিস্তৰ ক্ষতিসাধন কৰে। গুৱাহাটী মহানগৰীত বিশেষকৈ ধুমুহাৰ দিনত আৰু বাৰিষা কালত এনে বানপানীৰ দুৰ্যোগৰ সৃষ্টি হয়।

এই সমস্যা বৰ্তমানে এক ৰাজহুৱা অভিযোগত পৰিণত হৈছে। দ্ৰুত নগৰীকৰণৰ লগে লগে গৃহ নিৰ্মাণ আৰু অন্যান্য নিৰ্মাণ কাৰ্য্য দ্ৰুতগতিৰে বৃদ্ধি পাবলৈ ধৰাৰ পৰিণতি স্বৰূপে গৃহ, পথ আৰু অন্যান্য সা-সুবিধাসমূহ বৃদ্ধি পোৱাৰ সমান্তৰালভাৱে জলাশয়সমূহ হ্ৰাস পাবলৈ ধৰিছে আৰু পানী পৰিবাহী নলা-নৰ্দমাসমূহো বন্ধ হোৱাৰ ফলস্বৰূপে বানপানীৰ সৃষ্টি হয়। তদুপৰি বৰ্ধিত জনসংখ্যাৰ বসবাসৰ উদ্দেশ্যে চহৰৰ অপৰিকল্পিত বিস্তৃতকৰণ আদি কাৰ্য্যই জলাহ ভূমিসমূহ আৰু বনাঞ্চলসমূহ সংকোচিত কৰি আনিছে। এই কাৰকসমূহে কৃত্ৰিম বানপানীৰ সৃষ্টি কৰিছে। যোৱা কিছু দশকৰ পৰা গুৱাহাটীত এনে কৃত্ৰিম বানপানীৰ দৃশ্য দেখিবলৈ পোৱা গৈছে।

গুৱাহাটীত নগৰীয়া কৃত্ৰিম বানপানী হ্ৰাস কৰাৰ উদ্দেশ্যে আটাইবোৰ বিভাগ আৰু অংশীদাৰৰ সহযোগত ‘Mission Flood Free Guwahati’ অৰ্থাৎ ‘লক্ষ্য বানপানী মুক্ত গুৱাহাটী’ নামেৰে এটি আঁচনি আৰম্ভ কৰা হৈছে। ইয়াত জড়িত হৈ থকা বিভাগসমূহে কৃত্ৰিম বানপানী হ্ৰাস কৰাৰ উদ্দেশ্যে সহযোগিতাৰে কাম কৰিব।

এই কাৰ্য্যৰ বাবে বিশেষকৈ চাৰিটা বিভাগে দায়িত্বভাৰ গ্ৰহণ কৰিছে। বিভাগকেইটা হৈছে:

গুৱাহাটী পৌৰনিগম

জল সম্পদ বিভাগ

গুৱাহাটী মহানগৰ উন্নয়ন কৰ্তৃপক্ষ

গড়কাপ্তানি বিভাগ